Búið er að opna tjaldsvæðið í Ólafsfirði formlega og komu fyrstu gestir sumarsins fyrir helgina og voru á húsbíl. Nýtt aðstöðuhús var sett upp síðasta sumar, en þar eru tvær sturtur, eldunaraðstaða, þvottavél og þurrkari. Á svæðinu er einnig opið grillhús. Gestir hafa talað vel um þessa aðstöðu og er hún öll til fyrirmyndar.
En nú er í undirbúningi 9 holu frisbí-golfvöllur sem settur verður upp í sumar, ásamt mini-golfvellinum og einnig hreystitæki. Afþreying fyrir alla og stutt í gönguleiðir og leiktæki á skólalóð grunnskólans.
Tjaldsvæðið í Ólafsfirði er mjög vel staðsett, við hliðina á sundlaug bæjarins og íþróttahúsi þar sem hægt er að komast í líkamsrækt. Mjög miðsvæðis tjaldsvæði þar sem stutt er í næstu verslun og veitingahús. Ærslabelgurinn er einnig skammt frá tjaldsvæðinu.
Eftir breytingar sumarsins verður þetta eitt fjölskylduvænasta tjaldsvæðið á landinu.
Velkomin til Fjallabyggðar í sumar.
Ljósmyndir með frétt frá Tjaldsvæði Fjallabyggðar/ Guðmundur Ingi Bjarnason, tjaldvörður.
