Fjallabyggð gerir ráð fyrir að fjárfestingageta sveitarfélagsins nemi um 522 milljónum króna fyrir árið 2026 og einnig er gert ráð fyrir lántöku á allt að 400 milljónum sem að hluta er gert ráð fyrir að færist á árið 2027 til fjárfestinga. Gert er ráð fyrir því að ríflega 20 milljónum meira verði varið í viðhald á árinu 2026 en áætlað var á árinu 2025 og er sérstök áhersla á skólahúsnæði bæði grunnskóla og leikskóla.
Bæjarstjórn Fjallabyggðar hefur samþykkt að farið verði í eftirfarandi stærri framkvæmdir á árinu 2026:
- Uppbygging þjóðvegar í gegnum Ólafsfjörð ásamt gangstéttarframkvæmdum
- Endurbætur á lagna- og tæknirými í sundlauginni á Siglufirði
- Uppbygging knatthúss á æfingasvæði KF í Ólafsfirði
- Viðbygging við leikskólann í Ólafsfirði
- Endurbætur á skólahúsnæði við Norðurgötu á Siglufirði
- Malbikun á Ránargötu og við kirkjugarð við Saurbæjarás
- Framkvæmdir við nýjan kirkjugarð í Ólafsfirði
- Framkvæmdir við Skálarhlíð, múrviðgerðir, endurnýjun eldhúss og fleira
- Framkvæmdir við vatnsveitu í Ólafsfirði og eftirlitskerfi vatns- og fráveitu í báðum byggðarkjörnum
- Gangstéttarframkvæmdir í báðum byggðarkjörnum
- Frágangur á tjaldsvæðinu í Ólafsfirði
- Hönnun á göngustígum í Ólafsfirði og malbikun og lýsing á göngustíg við ósinn í Ólafsfirði
- Auk þessa ýmis smærri verkefni
