Miklar framkvæmdir hafa átt sér stað á skíðasvæðinu í Skarðsdal á Siglufirði núna í haust.  Færslan á svæðinu er loksins orðin að veruleika. Neðsta lyftan var tekin niður og er hún í uppgerð og verður sett upp að Súlum og fær því nafnið Súlna-lyfta.  Vonandi verður hægt að reisa þá lyftu í janúar 2024,  því það bíða margir spenntir eftir nýrri brekku.

Búið er að byggja nýjan glæsilegan lyftuskúr við T-lyftu og einnig er búið að færa drifstöð á T-lyftu á nýjan stað til framtíðar. Þá er búið að grafa fyrir vatni og rafmagni og flytja allar gámaeiningarnar upp á nýja planið.  Einnig stendur til á næstu dögum að fara setja upp töfrateppið sem mörg börn og fleiri hafa beðið lengi .

Þetta er allt að smella saman hjá skíðasvæðinu þótt það séu mörg verkefni eftir fram að opnun. Stefnt er á að opna um jólin ef veðurguðir verða hliðhollir.

En allt það sem hefur tekist að gera á svæðinu þetta haustið hefði ekki gerst nema með alvöru fagmönnum, en það eru verktakarnir Bás ehf, L7 verktakar ehf, LFS ehf og Raffó ehf sem eiga stórt hrós skilið.

Það eru Barðsmenn ehf sem eru rekstraraðilar svæðins í ár og hefur verið í mörg horn að líta frá því þeir tóku við.

Mynd: Barðsmenn ehf.