500 ára siðbótarafmælis Marteins Lúthers verður minnst með með óvenjulega veglegum hætti í ár á Hólahátíð 11.-13. ágúst, að Hólum í Hjaltadal.
Hátíðin hefst föstudaginn 11. ágúst með listgjörningnum Tesur á Hólahátíð sem hefst kl. 17:00 í Auðunarstofu. Þar munu myndlistarlistakonurnar Guðrún Kristjánsdóttir og Ólöf Nordal kynna gjörninginn. Síðan er gengið í Nýjabæ og Hóladómkirkju.
Gestum verður boðið að semja og teikna sínar eigin “tesur” sem prentaðar verða með háprenti á pappír og síðan neglir hver og einn sína tesu á tréhurð í kirkjunni. Myndlistargjörningurinn fer fram alla helgina fram eftir kvöldi.
Verkið á að minna á gjörninginn þegar Lúther negldi “tesurnar” 95 á kirkjudyr í Wittenberg og markaði þannig upphaf siðbótar í Evrópu.
Laugardaginn 12. ágúst kl. 9:00 f.h. verður pílagrímaganga eftir Hallgrímsveginum frá Gröf á Höfðaströnd heim að Hólum. Leiðin er 22 km. á jafnsléttu. Bílferðir verða í boði fyrir og eftir göngu frá Hólum og er hægt að panta þær hjá sr. Gylfa í síma 895-5550.
Kl. 16:00 eða að göngu lokinni verður sérstök athöfn sem kölluð er endurnýjun skírnarinnar og eftir hana er altarisganga í Hóladómkirkju. Þetta er einföld og falleg athöfn sem höfðar til persónulegrar upplifunar hvers og eins. Öllum er velkomið að taka þátt í þeirri athöfn hvort sem þau hafa gengið pílagrímagönguna eða ekki.
Kl. 19:00 er síðan kvöldverður “Undir Byrðunni” í anda hátíðarinnar.
Sunnudaginn 13. ágúst. kl. 11:00 verður flutt tón-leikhús um tvær siðbótarkonur, þær Elísabetu Cruciger og Halldóru Guðbrandsdóttur í Hóladómkirkju. Elísabet var nunna sem snerist til hins nýja siðar og var eitt af fyrstu sálmaskáldum siðbótarinnar og samstarfskona Marteins Lúthers. Hún átti sálm í fyrstu sálmabók Lúthers og í fyrstu útgáfu Grallarans, messubók Guðbrands Þorlákssonar, biskups á Hólum. Halldóra var dóttir Guðbrands biskups og var fóstra Hallgríms Péturssonar og bústýra á Hólum með leyfi konungs í forföllum föður sins. Það eru þær Diljá Sigursveinsdóttir og Guðný Einarsdóttir sem hafa sett leikhúsið saman með tónlist frá barokktímanaum í Þýskalandi og grallarasöng frá siðbótartímanum á Íslandi. Það er ReykjavíkBarokk sem flytur verkið, en fram koma 12 hljóðfæraleikarar, fjórir söngvarar og leikkona auk kirkjukóra Hofsóss- og Hólaprestakalls.
Kl. 14:00 á sunnudeginum er hátíðarmessa í Hóladómkirkju með þátttöku ReykjavíkBarokk. Í messunni verður mag.theol Stefanía Guðlaug Steinsdóttir vígð til prestsþjónustu í Lögmannshlíðarprestakalli.
Eftir messuna er að venju veglegt veislukaffi í Hólaskóla, sem öllum kirkjugestum er boðið í.
Kl. 16:30 er hátíðasamkoma í Hóladómkirkju.
ReykjavíkBarokk sér um tónlist og hátíðarræðu flytur sr. Auður Eir Vilhjálmsdóttir fyrsta konan sem hlaut prestsvígslu á Íslandi.