Fréttamaður Héðinsfjarðar.is hafði samband við forráðamenn hjá Golfklúbbi Fjallabyggðar í vor og vildi forvitnast nánar um starfið hjá þeim. Klúbburinn starfar í Ólafsfirði og heitir völlurinn þeirra Skeggjabrekkuvöllur. Tilgangur og markmið félagsins er að iðka, glæða og viðhalda áhuga á golfíþróttinni og styðja þannig við almenna íþróttaiðkun í Fjallabyggð. Viðtalið má lesa hér að neðan.
Viðtal við GFB
1. Hvernig leggst golfsumarið í ykkur hjá Golfklúbbi Fjallabyggðar? Sumarið leggst mjög vel í okkur og tilhlökkunin er mikil.
2. Hvað verða mörg mót í sumar og hvaða mót hefur verið vinsælast hjá ykkur? Mótaskráin fyrir sumarið er í vinnslu og því ekki orðin fullmótuð. Á síðasta ári héldum við um 30 mót og má reikna með svipuðu í ár.
Vinsælustu mótin hjá klúbbnum eru Norðurlandsmótaröðin sem er unglingamótaröð á Norðurlandi. Golfklúbbur Fjallabyggðar hefur verið þátttakandi í þessari mótaröð frá árinu 2009. Síðan höfum við haldið Minningamót um látna félaga árlega um verslunarmannahelgina sem hefur verið mjög vel sótt.
3. Eru framkvæmdir á völlum eða aðstöðu skipulagðar hjá ykkur? Já það eru framkvæmdir í gangi hjá okkur. Við erum að vinna í fjórum nýjum brautum. Þar af leiðandi munum við koma fyrir æfingasvæði (e: driving range).
4. Fái þið marga utanfélagsmenn til að spila golf á Skeggjabrekkuvelli, eða hvernig er skiptingin hjá ykkur? Það er ekki mikið um að utanfélagsmenn spili hjá okkur. Það er þá helst í tengslum við starfsmannamót fyrirtækja. En það hefur aukist hjá okkur að fyrirtæki halda starfsmannamót til þess að efla andan meðal starfsfólksins.
5. Hvenær má reikna með að völlurinn opni í sumar? Við reiknum með að opna völlinn í kringum mánaðarmótin maí-júní.
6. Hvað eru mörg stöðugildi í kringum reksturinn hjá Golfklúbbi Fjallabyggðar? Við erum með tvo vallarstarfsmenn og síðan erum við með einn starfsmenn í hlutastarfi sem sér um þjálfun og kennslu hjá félaginu.
7. Hvað eru margir félagar í klúbbnum? Það eru 102 félagsmenn í klúbbnum. En það lítur út fyrir að það muni fjölga í ár.
8. Hvernig gengur að fá ungt fólk í golfíþróttina í Fjallabyggð? Það hefur gengið mjög vel. En við erum að glíma við sama vandamál og hin íþróttafélögin þ.e brottfall úr íþróttinni. En þessir einstaklingar koma samt sem áður sterkir inn í félagið aftur síðar. Við höfum verið í samstarfi við golfklúbbanna á Norðurlandi með að efla barna og unglingastarfið.
9. Golfklúbbur Ólafsfjarðar var stofnaður 1968, verður haldið eitthvað sérstaklega upp á 50 ára afmæli 2018? Það hefur ekkert verið ákveðið með það. Líklega verðum við með afmælismót þar sem boðið verður uppá veislu að loknum leik.
Mótin í sumar hjá GFB
Hægt er að sjá upplýsingar um mót hjá klúbbinum í sumar á vef golf.is. Þökkum Rósu hjá GFB kærlega fyrir svörin.
