Vinnumálastofnun segir upp leigusamningi á Sauðárkróki

Vinnumálastofnun hefur sagt upp leigusamningi við sveitarfélagið Skagafjörð um húsnæði á Faxatorgi 1, Sauðárkróki, með árs fyrirvara. Þá hefur stofnunin hætt starfsemi á Húsavík.
Byggðarráð Skagafjarðar hefur lagt fram og samþykkt svohljóðandi bókun:
Byggðaarráð Sveitarfélagsins Skagafjarðar harmar þá ákvörðun Vinnumálastofnunar að loka starfsstöð sinni á Sauðárkróki. Ákvörðun um slíkt er í algjörri andstöðu við stefnu ríkisstjórnarinnar um fjölgun opinberra starfa á landsbyggðinni og á skjön við þá byggðastefnu sem boðuð hefur verið. Byggðarráð hvetur stjórnvöld til að tryggja að forstöðumenn ríkisstofnana gangi í takt við stefnu ríkisstjórnarinnar í byggðamálum og standi vörð um opinber störf á landsbyggðinni. Í ljósi þessa hvetur byggðarráð Vinnumálastofnun til að endurskoða ákvörðun sína varðadi lokun starfstöðvarinnar á Sauðárkróki.”