Vel heppnaðir Trilludagar á Siglufirði

Trilludagar voru haldnir á Siglufirði  í annað sinn um nýliðna helgi og þóttu þeir takast einstaklega vel að þessu sinni.  Þrátt fyrir lélega veðurspá voru tjaldsvæðin full af fólki sem mætt voru til að njóta helgarinnar á Siglufirði. Talið er að um 1500 manns hafi verið á hátíðinni og um 400-500 hafi farið í sjóferð með trillukörlum. Lítið var um sól og háan hita á laugardag, en dagurinn var að mestu þurr, en sunnudagurinn var aðeins blautari og strekkings vindur og voru nokkrir viðburðir færðir inn í hús.

 

Trilludagar voru skipulagðir í samvinnu við átta eldhressa trillukarla en gestum hátíðarinnar var boðið að stíga um borð í bátana og sigla með þeim út á fjörðinn þar sem rennt var fyrir fisk. Þegar í land kom var fólki boðið að grilla fiskinn og stóðu tveir menn vaktina við flökun og aðrir tveir við grillið. Heitt grænmeti var borið fram með fisknum í boði Kjörbúðarinnar á Siglufirði.  Allir sem fóru um borð borð fengu nestispakka frá Aðalbakaríinu og drykk frá Kjörbúðinni á Siglufirði.

Milli kl. 16:00 – 18:00 var svo öllum boðið í grillveislu og hélt dúettinn Stúlli og Danni uppi rífandi Trilludagsstemningu á sviðinu á meðan.

Fleira var í boði á Trilludögum en þar má meðal annars nefna að Ingi Vignir Gunnlaugsson sýndi landnámshænur úr einkaræktun. Hannes Boy bauð uppá síldar- og sjávarréttarhlaðborð. Söngvaborg og Leikhópurinn Lotta skemmtu yngri kynslóðinni. Síldargengið fór rúnt um miðbæinn og var með síldarsöltun við Síldarminjasafnið, bryggjuball og harmonikkuleik.  Börnum var boðið að fara á hestbak og tónlistarmenn úr heimabyggð komu fram á sviði en það voru bræðurnir Tryggvi og Júlíus Þorvaldssynir, Þórarinn Hannesson, Sturlaugur Kristjánsson og Daníel Pétur Daníelsson.

Ljóst er að Fjölskylduhátíðin Trilludagar er komin til að vera enda mikil ánægja með daginn.