Veikur gönguskíðamaður á Melrakkasléttu

Björgunarsveitir frá Kópaskeri og Raufarhöfn sóttu í morgun veikan gönguskíðamann á Melrakkasléttu. Maðurinn var á ferð ásamt fjórum öðrum og hugðist hópurinn ganga yfir Ísland og lagði upp frá Rifi fyrir nokkrum dögum. Ferðin hefur gengið hægt hjá hópnum og í morgun barst beiðni um aðstoð þar sem einn göngumannanna var orðinn veikur.

Maðurinn var ferjaður á snjósleða í björgunarsveitarbíl sem flutti hann til Kópaskers. Aðrir í hópnum eru á leið þangað á gönguskíðum og hyggjast bíða þar af sér það slæma veður sem spáð er í dag og á morgun.