Vegagerðin varar við mikilli umferð í kringum Stráka- og Múlagöng

Vegagerðin vill benda vegfarendum á að búast má við mikilli umferð um land allt um næstu helgar, eins og undanfarin ár. Vegfarendur eru því hvattir til að sýna tillitsemi, þolinmæði og kurteisi á för sinni um þjóðvegi landsins.

Á ýmsum stöðum má reikna með einhverjum töfum á mestu álagstímum, ekki síst í nánd við skipulagðar stórsamkomur. Til dæmis má reikna með mikilli umferð til og frá Siglufirði og líklegt að einhverjar tafir geti orðið við og í Stráka- og Múlagöngum, sem bæði eru einbreið með útskotum til mætinga. Það sama á reyndar við um næstu helgi þar á eftir, þegar samtímis verður Fiskidagurinn mikli á Dalvík, Pæjumótið í Fjallabyggð og Króksmótið á Sauðárkróki.

Á þessum slóðum eru vegfarendur sérstaklega hvattir til að sýna varkárni og tillitsemi.

Hugsanlega mun lögregla grípa til sérstakrar umferðarstjórnunar um þessi jarðgöng til að koma í veg fyrir umferðarteppur, en reiknað er með að mesti álagstíminn verði milli kl. 13:00 og 19:00, eins og reyndar á við um þjóðvegakerfið almennt.