Uppfærðar sóttvarnaraðgerðir vegna Covid-19 á HSN

Heilbrigðisstofnun Norðurlands hefur uppfært sóttvarnaraðgerðir sem hafa þegar tekið gildi.

Almennt gildir:

• Starfsmenn viðhafa grundvallarsmitgát við öll störf sem felst meðal annars í handhreinsun og viðeigandi notkun hlífðarbúnaðar.

• Þegar um grímuskyldu er að ræða nægir að jafnaði að annað hvort starfsmaður eða skjólstæðingur beri grímu.

• Starfsmaður með einkenni sem bent gætu til Covid-19 smits á ekki að mæta í vinnu en fara í sýnatöku. Starfsmaður er í einangrun þar til neikvætt svar liggur fyrir.

• Ef skjólstæðingur er með sýkingareinkenni eða einkenni sem gætu bent til Covid-19 skal nota grímu og eftir atvikum viðeigandi hlífðarbúnað. Eftir sem áður skal einstaklingur með Covid-19 grunsamleg einkenni fara í sýnatöku og sýna fram á neikvætt svar áður en hann kemur til skoðunar.

 

Heilsugæslan:

• Starfsmannafatnaður er valkvæður.

• Í móttöku og á röntgen og rannsókn skal annað hvort starfsmaður eða skjólstæðingur bera grímu, að jafnaði skjólstæðingurinn, þegar um snertingu og mikla nánd er að ræða. Undantekningu má gera ef eingöngu er um viðtal að ræða eða starfsmaður þekkir vel til skjólstæðings og tryggt er að hann er ekki með sýkingareinkenni eða einkenni sem bent gætu til Covid-19 smits.

 

Heimahjúkrun:

• Þegar skjólstæðingur og starfsmaður eru fullbólusettir er ekki grímuskylda.

 

Sjúkradeildir:

• Annað hvort skjólstæðingur eða starfsmaður skal bera grímu og almennt er það starfsmaðurinn.

• Tveir gestir mega heimsækja sjúkling í einu. Stjórnandi getur veitt undanþágu frá fjölda heimsóknargesta við sérstaka aðstæður.

• Gestir skulu nota grímu.

• Fólk með einkenni smitsjúkdóma á ekki að koma í heimsóknir.

 

Hjúkrunardeildir:

• Þegar skjólstæðingur og starfsmaður eru fullbólusettir er ekki grímuskylda.

• Að öllu jöfnu mæti aðeins tveir gestir í heimsókn til íbúa á hverjum tíma nema að höfðu samráði við starfsfólk deildar.

• Gestir fara rakleiðis að herbergi íbúa og aftur að útidyrum að heimsókn lokinni, mega ekki staldra við í sameiginlegum rýmum heimilis og þurfa að þvo hendur með sápu eða spritta áður en gengið er inn á heimili og einnig við brottför.

• Fullbólusettir heimsóknargestir þurfa ekki að bera grímu nema skjólstæðingur sé ekki fullbólusettur (sjá þó hér að neðan ef gestir koma erlendis frá).

• Heimsóknargestir sem ekki eru fullbólusettir þurfa að bera grímu.

• Fullbólusettir heimsóknargestir sem dvalið hafa erlendis mega koma í heimsókn að höfðu samráði við stjórnendur deilda og að því tilskyldu að þeir séu með öllu einkennalausir. Mælst er til að þeir séu með andlitsgrímu þar til á 7. degi eftir heimkomu.

• Óbólusettir aðstandendur sem eru að koma erlendis frá mega ekki koma í heimsókn inn á heimilin fyrr en 14 dagar eru liðnir frá heimkomu (undanþágu er hægt að fá í samráði við stjórnendur deildar ef um skyndileg veikindi/lífslokameðferð er að ræða hjá íbúa).

• Fólk með einkenni smitsjúkdóma á ekki að koma í heimsóknir.

• Utanaðkomandi persónuleg þjónusta við íbúa og dægrastytting (t.d. hársnyrtifólk, fótaaðgerðarfræðingar, hljóðfæraleikarar) þurfa ekki að bera grímu séu þeir fullbólusettir en viðhafa grundvallarsmitgát.

 

Matsalir:

• Mælst er til að starfsmenn haldi persónulegar sóttvarnir og spritti hendur fyrir og eftir komu í matsal.

 

Fullbólusettur starfsmaður sem ferðast erlendis – breytingar 1.júlí 2021

• Starfsmaður er undanþeginn sóttkví í samfélaginu gegn framvísun vottorðs um bólusetningu á landamærum.

• Starfsmaður skal fara strax í sýnatöku við komu til landsins og skila neikvæðu PCR prófi áður en hann kemur til vinnu. Starfsmaður fer þá í vinnusóttkví C og þarf að skila neikvæðu PCR prófi 5 dögum eftir komu til að losna úr sóttkví C.