Nemendur og kennarar í menningarlæsi í Menntaskólanum á Akureyri gerðu sér glaðan í Kjarnaskógi í vikunni á síðasta kennsludegi vorannar. Eftir grisjun í skóginum undanfarin misseri biðu gestanna úr MA ærin verkefni. Dagskráin hófst á góðri vinnulotu þar sem trjágreinum var safnað saman og heilu trjádrumbarnir bornir á milli staða vítt og breitt um skóginn.
Allt var unnið undir handleiðslu starfsmanna Kjarnaskógar. Eftir burðinn gæddu sjálfboðaliðarnir sér á pizzu. Veðrið var gott, skógurinn veitti skjól gegn kaldri golunni og sólin lét sjá sig.
Frá þessu var fyrst greint á vef Menntaskólans á Akureyri.
