Tónleikar í Hofi til heiðurs Ingimari Eydal

Tónleikar sem nefnast “Fjölskylduferð á skódanum” til heiðurs Ingimari Eydal, sem hefði orðið 75 ára þann 20. október næstkomandi. Tónleikarnir verða haldnir í Hofi á Akureyri, laugardaginn 22. október kl. 20 (uppselt) og kl. 23 og síðan sunnudaginn 23. október kl. 16. Þessi ferð í Skódanum hans Ingimars verður full af elskulegheitum og óvæntum uppákomum!

Yfirskrift tónleikanna er “Fjölskylduferð í Skódanum” sem er tilvísun í brandara sem gjarna var sagður af Ingimari en vísar líka til þess að þessir tónleikar munu líklega sýna fleiri hliðar á Ingimari en áður hafa komið fram og eiginlega ómögulegt að sjá fyrir um hvað gerist í þessari ferð á Skódanum.

Tónlistar og hljómsveitarstjóri verður Karl Olgeirsson  og með honum  verður sannkallað stórskotalið eða þeir Gunnar Gunnarsson, Jón Rafnsson, Sigurður Flosason, Hannes Friðbjörnsson og Jón Elvar Hafsteinsson. Það eru svo þau Guðrún Gunnarsdóttir og Stefán Hilmarsson sem sjá um söng ásamt Ingu Eydal og Ingimari Birni Davíðssyni. Heiðursgestir verða svo söngvararnir ástsælu Helena Eyjólfsdóttir og Þorvaldur Halldórsson.

Kynnir verður Margrét Blöndal og mun hún með aðstoð sviðsgaldra ýmis konar leiða gesti inn í heim tónlistarinnar og þess andrúmslofts sem fylgdi þessum einstaka og dáða listamanni á lífsleiðinni. Andrúmslofts sem einkenndist af elskulegheitum og glaðværð. Víða verður komið við, rifjuð upp tónlist frá ýmsum æviskeiðum Ingimars, ef til vill sagðar af honum ein eða tvær sögur og ferðast svolítið með tímavélinni um gömlu Akureyri, þegar við áttum “Lindu, Kea, Amaro og SÍS”

Tíminn.is greinir frá.