Sýningin Norðrið í norðrinu í Dalvíkurbyggð

Norðrið í Norðrinu er sýning sem opnar þann 2. júní næstkomandi á byggðasafninu Hvoli á Dalvík. Sýningin sjálf verður í Byggðasafninu Hvoli en opnun sýningarinnar verður í Menningarhúsinu Bergi á Dalvík 2. júní kl. 14:00.
Byggðasafnið Hvoll á Dalvík hefur unnið að þvi sl. mánuði að búa til sýningu á munum frá Ittoqqortoormiit á Grænlandi en Dalvík og Ittoqqortoormiit eru vinabæir og á byggðasafnið marga gripi þaðan.
Á sýningunni „ Norðrið í norðrinu“ er reynt að varpa ljósi á það fólk sem býr í bæ sem er á norðurhjara veraldarinnar , 900 km norðar en næsta byggð. Konur og börn hafa mest vægi í sýningunni. Sýningin er römmuð inn af sérlega fallegum ljósmyndum eftir hollenska líffræðinginn og ljósmyndarinn Ko de Korte en hann tók myndirnar á árunum 1973 – 1975.


Börn og dansarar frá Ittoqqortoormiit sýna listir sínar. Þar verða einnig munir frá Grænlandi , hundasleði meðal annars. Hundasleðinn verður settur upp í Bergi dagana fyrir opnun og gæti verið skemmtilegt að fylgjast með þegar sleðinn er fluttur á staðinn og settur upp.

Nánar á www.dalvik.is

 

 

Heimild og myndir: www.dalvik.is