Sunnudagskaffi í Alþýðuhúsinu og sýningaropnun

Helgina 6. – 7. júlí verður mikið um að vera í Alþýðuhúsinu á Siglufirði.  Laugardaginn 6. júlí kl. 14.00 opnar Unndór Egill Jónsson sýningu í Kompunni sem ber yfirskriftina Fleygur, og stendur sú sýning til 28. júlí.

Sunnudaginn 7. júlí kl. 14.30 er boðið uppá Sunnudagskaffi með skapandi fólki þar sem Línus Orri Gunnarsson sér um þjóðlagasamspil. Samspilið fer þannig fram að fólk sest í hring með hljóðfærin sín og spilar það sem það kann úr alþýðuarfi. Allir velkomnir til þess að taka þátt eða hlusta.

Fleygur
Undarfarin ár hefur Unndór Egill verið heillaður að viðarasamsetningum og þeirri virkni sem þær gegna í strúktúrum. Á þessari sýningu hefur Unndór unnið 4 þrykk þar sem sérstakri athygli er beint að því mótsagnakennda hlutverki sem fleygur gegnir í þeim samsetningum.

Tré, sem er grunn efniviður sýningarinnar, mótast af þeim umhverfisþáttum sem eru á vaxtarstað þess. Sólin togar greinarnar í átt til sín. Snjóþyngslin þrýstir því niður. Vatnið flytur að næringu og vindurinn fettir það og brettir. Þegar trjá bolurinn er flettur birtist þessi frásögn í víxlun á sumar- og vetraræðum trésins. Ár eftir ár hleður tréð á sig vitneskju um umhverfi sitt og verður sem lífræn formmyndun þess.

Það má segja að við fyrstu sýn virðist sem geómetrísku línur samsetningarinnar og lífrænu æðar viðarins séu andstæðingar og vinni gegn hvort öðru. En þegar betur er að gáð sést að baki hönnun samsetningarinnar liggur skilningur á eðli trésins. Því viðarsamsetningin tekur mið af náttúrlegum hreyfingum viðarins. Þannig beinir Unndór sjónum að þeim mætti sem verður til þegar andstæður vinna saman og er það von hans að það gefi byr undir vængi þeirra hugmyndar að veröldin sé ein samfeld heild í stað þess að vera samset úr mörgum aðskildum hlutum. Vonarneisti þeirrar hugsunar liggur í aðgerðinni að reka fleyg í samsetninguna því í stað þess að sundra þá sameinar hann.

Unndór Egill Jónsson útskrifaðist með Ba gráðu frá Listaháskóla Íslands árið 2008 og svo með Mfa gráðu frá Listaháskólanum Valand í Gautaborg í Svíþjóð árið 2011. Unndór hefur verið virkur í sýningarhaldi frá útskrift bæði hér á landi sem og erlendis. Helstu sýningar eru Momentu Design í Momentum Arthall í Moss í Noregi árið 2010, Ríki, flóra, fána, fabúla í Listasafni Reykjavíkur árið 2016, Cloudbusters: Intensity vs. Intension í Estonian Museum of Contemporary Art í Tallinn í Eistlandi árið 2018 og einkasýningin Tvívængja í Nýlistarsafninu árið 2015. Með fram sýningarhaldi hefur Unndór verið mjög virku í félagsstarfi innan listheimsins, hann gengdi stöðu formans Myndhöggvarfélagsins í Reykjavík á árunum 2013 til 2015. Þá hefur hann tekið að sér sýningarstjórnun, skipulagst listviðburði. Með fram myndlistinni starfar Unndór nú sem kennari og forstöðumaður verkstæða hjá Listaháskóla Íslands.

Uppbyggingasjóður/Eyþing, Fjallabyggð, Norðurorka, Aðalbakarí, Rammi ehf. Samfélags og menningarsjóður Siglufjarðar og Kjörbúðin styrkja menningarstarf í Alþýðuhúsinu á Siglufirði.