Stór skjálfti 30 km frá Siglufirði mældist 5,8

Klukkan 19:07 í kvöld varð jarðskjálfti rúma 30 km Norð- norðaustan af Siglufirði af stærðinni 5,8 samkvæmt fyrstu niðurstöðum Veðurstofu Íslands. Skjálftinn fannst víða á Norðurlandi. Kl. 18:20 í dag varð skjálfti af stærð 4,4 um 35km norður af Siglufirði. Tilkynningar hafa borist um að allir skjálftarnir fundist frá Siglufirði til Akureyrar. Skjálftinn sem reið yfir kl. 19:07 er stærsti skjálftinn sem mælst hefur í hrinunni. Skjálftinn átti hinsvegar upptöku talsvert fjær landi en fyrri skjálftar og því voru áhrif þessa skjálfta ekki eins mikil inn til landsins.

Starfsmenn frá Veðurstofunni og Náttúrufræðistofnun fóru í vettvangsflug um Norðurland með Landhelgisgæslunni seinni partinn í dag. Tilgangur ferðarinnar var meðal annars að kanna óstöðugleika í hlíðum og ummerki um skriðuföll á svæðinu.

Flogið var yfir nyrsta hluta Tröllaskaga þar sem áhersla var lögð á að kanna þekkt jarðsigssvæði og hlíðar ofan vega og ofan við þéttbýli. Eins voru ummerki um hrunin í Gjögurfjalli og Hvannadalsbjargi skoðuð sérstaklega en neðan þeirra mátti sjá myndarlegar skriðudyngjur sem staðfesta að þar urðu skriður.

Niðurstöður ferðarinnar voru jákvæðar með tilliti til skriðufalla þar sem engin ummerki um stórfelldar sprungur var að finna á þessum svæðum og því engar sterkar vísbendingar um yfirvofandi stórfellt hrun af völdum stórra jarðskjálfta. Eins sáust engin ummerki um að stórar fyllur hefðu fallið úr hlíðum. Vegna mikillar óvissu um áframhaldandi þróun jarðskjálftavirkninnar er ekki þó ekki hægt að útiloka slíka atburði í framtíðinni. Á þeim stöðum þar sem auðvelt var að greina ummerki um skriður eða grjóthrun var yfirleitt um svæði að ræða þar sem mikið er jafnan af lausaefnum, hlíðar bratta og skriður þar algengar.

Heimild: vedur.is