Starfsmenn Síldarminjasafnsins höfundar nýrrar ljósmyndabókar

Starfsfólk Síldarminjasafnsins á Siglufirði hefur unnið að útgáfu ljósmyndabókar undanfarið ár. Mikill metnaður var lagður í gerð bókarinnar sem telur rúmar 300 síður.
Bókin, sem ber heitið Siglufjörður. Ljósmyndir 1872-2018, er væntanleg úr prentun í byrjun desember 2018.  Bókina er hægt að panta í forsölu hjá Síldarminjasafninu. Annað hvort með tölvupósti á netfangið safn@sild.is eða með því að hringja í síma 467-1604. Bókin kostar kr. 9.500 hjá Síldarminjasafninu. Höfundar bókarinnar eru: Anita Elefsen safna- og sagnfræðingur, Steinunn M. Sveinsdóttir sagnfræðingur og Örlygur Kristfinnsson, fyrrum safnstjóri.

Á kápu bókarinnar segir:

Siglufjörður. Fáir bæir eiga jafn viðburðaríka sögu og Siglufjörður; hið ótrúlega ris staðarins sem byggðist á síldinni, einum helsta örlagavaldi Íslendinga á 20. öld. Lítið og afskekkt hákarlaþorp komst óvænt í alfaraleið erlendra fiskveiðiþjóða og varð að höfuðstað síldarinnar í Atlantshafi. En svo hvarf síldin – hvað gerðist þá í þessari litlu borg við ysta haf?
Hér er sagan rakin í 140 völdum ljósmyndum og stuttum textum á íslensku og ensku. Samtímis því að skoða meginþættina í sögu staðarins er skyggnst ofan í hið smáa og hversdagslega, athafnir hinna fullorðnu og leiki barnanna svo dæmi séu nefnd.
Þetta er bók sem allir þeir sem áhuga hafa á sögu Siglufjarðar, eða tengjast honum á einn eða annan hátt, ættu að eiga.