Starfsmaður smitaður á Víðihlíð á Akureyri

Íbúar á hjúkrunarheimilinu Víðihlíð á Akureyri eru nú komnir í sóttkví ásamt þremur starfsmönnum vegna smits sem greindist hjá starfsmanni á fimmtudaginn. Viðkomandi starfsmaður hefur ekki verið í vinnu undanfarna daga.

Lokað er fyrir allar heimsóknir á Víðihlíð meðan á sóttkví stendur eða til og með 17. október að því gefnu að enginn greinist jákvæður í sýnatöku þann dag. Búið er að upplýsa alla íbúa og verið er að hafa samband við aðstandendur þeirra.

Viðbragðsáætlun var virkjuð og fyrirmælum rakningarteymis fylgt í hvívetna. Þetta er í annað sinn á stuttum tíma sem íbúar Víðihlíðar þurfa í sóttkví og í annað sinn síðan faraldurinn hófst sem smit hefur áhrif á starfsemi hjúkrunarheimila Heilsuverndar. Enn sem komið er hefur enginn íbúa smitast hvorki á Hlíð né Lögmannshlíð.

Aðgerðir á Víðihlíð hafa ekki áhrif á starfsemi annarra heimila þar sem lífið gengur sinn vanagang.