Skíðafélag Ólafsfjarðar hlaut samfélagsstyrk frá Norðurorku

Styrkir Norðurorku hf. til samfélagsverkefna vegna ársins 2013 voru afhentir við hátíðlega athöfn í matsal fyrirtækisins föstudaginn 4. janúar síðastliðinn.  Meðal styrkþega voru Skíðafélag Ólafsfjarðar fyrir uppbyggingu á Skíðasvæði.

Mynd frá www.no.is

Við úthlutun styrkja var horft til þeirra viðmiða sem félagið hefur sett í almennum úthlutunarreglum sínum og birtar eru á heimasíðunni www.no.is en auk þess var að þessu sinni litið til eftirfarandi atriða;

• Horft var til þess að verekfni á öllu starfssvæði Norðurorku hlytu styrki (Ólafsfjörður til og með Þingeyjarsveit).
• Horft var til þess að við síðustu styrkveitingu var lögð megináhersla á styrki til íþrótta- og æskulýðsmála og því heldur minni áhersla á þann málaflokk nú.
• Ákveðið var að meginþungi styrkja þetta árið færi til menningar- og listastarfs með áherslu á starf kóra.  Þá eru einnig styrkt nokkur verkefni í flokknum „ýmiss samfélagsmál“ og þar lögð áhersla á börn sem glíma við ofvirkni, athyglisbrest og einhverfu.
• Horft var til þess hvort umsækjendur hefðu nýlega og/eða oft fengið styrki á undangengnum árum.
• Byggt var á því að verkefnin sem hlytu styrk væru fjölbreytileg þannig að styrkþegar komi úr sem flestum áttum.

Samtals voru veittir styrkir til þrjátíu og þriggja verkefna samtala að fjárhæð 5.175.000 krónur.