Síldarminjasafnið fær 35 milljónir fyrir Salthúsið

Illugi Gunnarsson, mennta- og menningarmálaráðherra og Anita Elefsen, safnstjóri Síldarminjasafns Íslands undirrituðu í vikunni samning um stofnstyrk til að fjármagna hluta kostnaðar við uppbyggingu á svonefndu Salthúsi við Síldarminjasafnið á Siglufirði.

Salthúsið verður öðru fremur ætlað til varðveislu muna í eigu safnsins með aðstöðu fyrir skráningu, forvörslu og tengdra verkefna, auk þess sem þriðjungur hússins verður notaður fyrir sýningar, safnverslun og gestamóttöku, t.d. með fyrirlestrarsal.
Styrkurinn nemur 35.000.000 kr og greiðist á fjórum árum, fyrsta greiðsla árið 2017 og lokagreiðsla árið 2020.

Þessi rausnarlegi styrkur gerir safninu kleift að hefjast handa við vinnu innandyra fyrr en áætlað var og þar af leiðandi taka hluta hússins til notkunar fyrr en ella.

Á meðfylgjandi mynd má sjá starfsfólk Síldarminjasafnsins og hluta stjórnarmanna ásamt mennta- og menningarmálaráðherra. Örlygur Kristfinnsson, Steinunn M. Sveinsdóttir, Illugi Gunnarsson, Anita Elefsen, Guðmundur Skarphéðinsson og Gunnar Júlíusson. – Mynd: sild.is