Í ár hljóta 25 verkefni styrk úr Lóunni, nýsköpunarstyrk fyrir landsbyggðina. Meðal styrkhafa er Sigríður Vigdís Vigfúsdóttir úr Fjallabyggð, en hún hlaut 5,8. milljón króna styrk fyrir ChitoCare.
Heiti verkefnis:
Markaðsrannsókn og skráning á lækningatækjunum ChitoCare medical í Bandaríkjunum.
Lýsing á verkefni:
Markaðsrannsókn sem kannar hvernig lækningatækið passar inn á markaðinn og hvernig notkun þess fellur að endurgreiðslukerfi bandaríska sjúkratryggingakerfisins.
Úthlutun Lóunnar – styrkja til nýsköpunarverkefna á landsbyggðinni 2023
Hlutverk Lóunnar er að styðja við nýsköpun, eflingu atvinnulífs og verðmætasköpun sem byggir á hugviti, þekkingu og nýrri færni á forsendum svæðanna sjálfra. Í ár var sérstaklega horft til verkefna sem komin eru af byrjunarstigi og tengjast samfélagslegum áskorunum á borð við loftslagsmál, sjálfbærni í heilbrigðis- og menntamálum og sjálfbærni í matvælaframleiðslu.
Heildarfjárhæð úr Lóu 2023 er líkt og árin áður 100 milljónir króna.
Alls bárust alls 97 umsóknir og voru þær á fjölbreyttum sviðum og viðfangsefni þeirra ólík, allt frá hugmyndum á frumstigi til stærri verkefna sem komin eru vel á veg.
Sem dæmi um verkefni sem hljóta styrk í ár eru áburðarframleiðsla, þróun matvöru úr þangi og sjávarþara á Vestfjörðum, uppbygging sjálfbærar matvælaframleiðslu á Austurlandi, þróun og vinnsla bioplasts úr hampi á Norðurlandi Eystra og samfélagsverkefnis um að nýta rafíþróttir til að efla færni á vinnumarkaði á Norðurlandi.
Verkefni í öllum landshlutum hlutu styrk og kynjahlutfall er nokkuð jafnt.