Selur sást í Eyjafjarðará í dag

Selur sást á svamli í Eyjafjarðará í dag. Var hann kominn til móts við bæinn Ytragil og dólaði hann sér þar hinn rólegasti á sandeyrunum.

Þetta er ekki í fyrsta sinn sem selur sést í ánni en að sögn Hermanns Brynjarssonar hjá Veiðifélagi Eyjafjarðarár eru til sögur af selum sem synt hafa upp ána allt inn að Saurbæ. Algengara er þó að selir sjáist neðst í ánni og þá helst á vorin og haustin en þeir selir sem leita upp ána skipta þó tugum hvert ár.

Ferðalag upp ána er selunum þó ekki hættulaust því veiðifélagið hefur skyttu á sínum snærum sem stuggar við selunum eða skýtur þá,  enda bleikjustofninn í ánni viðkvæm auðlind sem selirnir ásælast.

Heimild: Rúv.is