Rótarýklúbburinn gaf hljóðfæri til Leikskólans í Ólafsfirði

Félagar í Rótarýklúbbi Ólafsfjarðar komu færandi hendi í Leikskólann Leikhóla í Ólafsfirði á dögunum. Tilefnið er árleg gjafa og styrkveitingar í tilefni af alþjóðlegum Rótarýdegi fyrr á árinu.

Það er markmið félaga að láta gott af sér leiða sem víðast í samfélaginu og er gjöfin hljóðfæri. Er hún að þessu sinni hugsuð fyrir heill og hamingju barnanna, þar sem vitað er að tónlist og tónlistariðkun er mjög gagnleg í uppvexti og þroska barna.

Börnin tóku hljóðfærunum fegins hendi og fengu að prufa, en áður en að því kom sögðu Olga Gísladóttir leikskólastjóri og K. Haraldur forseti Rótarýklúbbs Ólafsfjarðar nokkur orð og svo sungu börnin leikskólalagið,  Í leikskóla er gaman.

Klúbburinn hefur styrkt samfélagsverkefni í Ólafsfirði mörg undanfarin ár. Á yfirstandandi starfsári er áhersla klúbbsins að tengja sig við ungt fólk og gera rótarý sýnilegra fyrir alla og að vekja athygli á Rótarýstarfi í hópum unga fólksins sem og hjá foreldrum barnanna.
Myndir: K. Haraldur/Svavar Berg