Ritlistasmiðjan Ungskáld 2018 fer fram í Verkmenntaskólanum á Akureyri laugardaginn 27. október frá kl. 9-16. Markmiðið er að efla ritlist og skapandi hugsun hjá ungu fólki á aldrinum 16-25 ára því að kostnaðarlausu. Verkefnið Ungskáld hefur verið við lýði á Akureyri í nokkur ár og er það eina sinnar tegundar á landinu. Að verkefninu standa Akureyrarstofa, Verkmenntaskólinn á Akureyri, Menntaskólinn á Akureyri, Ungmennahúsið í Rósenborg og Amtbókasafnið.

Fyrri hluta dags leiðir rithöfundurinn Guðrún Eva Mínervudóttir vinnuna en eftir hádegið verður unnið undir leiðsögn Snæbjörns Ragnarssonar sem er betur þekktur sem Bibbi í Skálmöld. Þátttakendum verður boðið upp á létt hádegissnarl frá kl. 12-13.

Samhliða er efnt til ritlistakeppni sem er opin öllum ungmennum á aldrinum 16-25 ára. Þar verða veitt peningaverðlaun fyrir efstu þrjú sætin. Engar hömlur eru settar á texta, hvorki varðandi efnistök né lengd. Þeir þurfa þó að vera á íslensku. Ritlistakeppnin verður nánar auglýst síðar.

Ritlistasmiðjan laugardaginn 27. október er sem áður segir ókeypis fyrir þátttakendur og þeim ber að sjálfsögðu engin skylda til að skila inn textum í ritlistakeppnina.

Dagskrá:

Kl. 9:00 – 9:10 Mæting í Verkmenntaskólann
Kl. 9:10 – 12:00 Guðrún Eva Mínervudóttir, smiðja og vinnustofa
Kl. 12:00-13:00 Hádegishlé, saðsamur hádegismatur í boði Ungskálda
Kl. 13:00-16:00 Snæbjörn Ragnarsson, smiðja og vinnustofa
Kl. 16:00 Ritlistasmiðju lýkur

Skráning í Ritlistasmiðjuna fer fram á www.ungskald.is.