Ritlistasmiðja Ungskálda aftur haldin á Akureyri

Ritlistasmiðja Ungskálda 2021 verður haldin laugardaginn 23. október í Menntaskólanum á Akureyri en ekki tókst að halda hana í fyrra vegna stöðunnar í samfélaginu.

Leiðbeinendur eru rithöfundarnir Fríða Ísberg og Dóri DNA. Hér er komið tilvalið tækifæri fyrir ungt fólk á aldrinum 16-25 ára með áhuga á ritlist til að eflast og fræðast.  Skráning er til og með 21. október.

Samhliða ritlistasmiðjunni er efnt til ritlistakeppni Ungskálda þar sem veitt eru peningaverðlaun fyrir efstu þrjú sætin. Engar hömlur eru settar á texta, hvorki varðandi efnistök né lengd. Skilyrði er þó að textinn sé á íslensku. Tilvalið er fyrir áhugasama að taka þátt í ritlistasmiðjunni 23. október en þó þurfa þeir sem senda inn verk í keppnina ekki að taka þátt í ritlistasmiðjunni eða öfugt. Lokaskil verka í ritlistakeppnina er 16. nóvember.

Allar nánari upplýsingar á ungskald.is.

Ungskáld er verkefni á Akureyri sem gengur út á að efla ritlist og skapandi hugsun hjá ungu fólki á aldrinum 16-25 ára. Verkefnið er hið eina sinnar tegundar á Íslandi.

Í nefnd Ungskálda eru fulltrúar frá Akureyrarstofu, Verkmenntaskólanum á Akureyri, Menntaskólanum á Akureyri, Ungmennahúsinu í Rósenborg og Amtsbókasafninu. Hægt er að senda nefndinni fyrirspurnir á ungskald@akureyri.is.

Verkefnið er styrkt af Uppbyggingarsjóði Norðurlands eystra og Akureyrarbæ.

Heimild: akureyri.is