Ríkisstjórnin styrkir uppsetningu á La Traviata á Akureyri

Ríkisstjórnin samþykkti á fundi sínum í morgun að veita þremur milljónum króna af ráðstöfunarfé sínu til Menningarfélags Akureyrar og Sinfóníuhljómsveitar Norðurlands vegna uppsetningar á óperunni La Traviata. Uppsetning óperunnar sem sýnd verður bæði í Hofi á Akureyri og Eldborg er samstarfsverkefni Íslensku óperunnar og Menningarfélags Norðurlands.

Sinfóníuhljómsveit Norðurlands mun annast hljómsveitarleik á öllum sýningum, bæði á Akureyri og í Reykjavík. Sýningar verða í Eldborgarsal Hörpu 6. og 7. nóvember nk. og í Hofi á Akureyri 13. og 14. nóvember. Er um að ræða fyrstu óperuna sem sýnd er í Hofi.