Reiðskemma rís í Ólafsfirði

Hestamenn í hestamannafélaginu Gnýfara í  Ólafsfirði koma sterkir til baka eftir að hafa þurft að yfirgefa hesthús sín haustið 2006 þegar framkvæmdir við Héðinsfjarðargöng hófust. Í fjögur ár stóðu hesthús þeirra auð en hesthúsahverfi þeirra er ekki nema í 200 metra fjarlægð frá gangnamunanum.

17 hestamenn með 83 hross urðu að yfirgefa hesthús sín og hætta hestamennsku eða a.m.k færa sig um set í þennan tíma.Haustið 2010 fengu þeir leyfi til að snúa til baka og hægt og bítandi síðan þá hefur hestamennskan verið að eflast að nýju.

Gnýfari stóð fyrir ísmóti á Ólafsfjarðavatni í febrúar 2011 og  í febrúar 2012 og er ákveðið að um árlegan viðburð verði að ræða. Nú er svo komið að hafnar eru framkvæmdir við reiðskemmu á félagssvæðinu. Skemman verður  16 x 30 metrar að stærð og kemur til með að nýtast hestamönnum vel því oft er snjóþungt í firðinum. Á deiliskipulagi er svo einnig gert ráð fyrir reiðvelli á félagssvæðinu.

Þrátt fyrir endurkomu hestamanna í hverfið er ljóst að hestamennskan verður ekki söm og áður því mun meiri umferð er nú í næsta nágrenni en var. Á ljósmyndinni hér með fréttinni sést vel hve stutt er á milli hesthúsanna og gangnamunans.

Texti og mynd: Innsent efni.