Ráðherra ferðamála heimsótti Norðurland vestra

Þórdís Kolbrún Reykfjörð Gylfadóttir ráðherra ferðamála, iðnanðar og nýsköpunar var á ferð um Norðurland vestra í vikunni. Með henni í för voru Skarphéðinn Berg Steinarsson ferðamálastjóri ásamt starfsfólki ráðuneytisins og Ferðamálastofu. Hópurinn hóf yfirreiðina í Skagafirði þar sem heimsóttir voru ferðaþjónustuaðilar og smáframleiðendur og eftir stuttan spjallfund með fulltrúum ferðaþjónustunnar í Skagafirði var haldið fyrir Skaga. Þar var stoppað við Ketubjarg og í Kálfshamarsvík, en verkefni tengd þessum stöðum hafa fengið framlag úr Framkvæmdasjóði ferðamannastaða á síðustu misserum.

Nýjasti veitingastaðurinn á Norðurlandi vestra “Harbour restaurant” á Skagaströnd var heimsóttur áður en staðan var tekin með heimamönnum við Hrútey og á Þrístöpum, en á báðum þessum stöðum eru í gangi viðamiklar framkvæmdir, sem Framkvæmdasjóðurinn hefur komið að, og eiga eftir að skila ótrúlega áhugaverðum áfangastöðum fyrir svæðið.

Deginum lauk svo á Hvammstanga þar sem ráðherra dró að húni fána RÉTTIR food festival, sem er að hefjast, áður en smakkað var á framlagi Sjávarborgar til matarhátíðarinnar  og var enginn svikin af því.