Nemendur MTR taka þátt í Framhaldsskólaleikum í rafíþróttum

Rafíþróttamenn í Menntaskólanum á Tröllaskaga sigruðu alla sína leiki í fyrstu umferð Framhaldsskólaleikanna í rafíþróttum sem fram fór í vikunni. Keppt var í þremur tölvuleikjum; CS:GO, Rocket League og fótboltaleiknum FIFA 22.

Keppendur í CS:GO voru Andri, Björn, Hafsteinn, Jón Grétar og Ragnar Óli. Keppendur í Rocket League voru Viktor Már, Frímann Geir og Ragnar Óli og í FIFA 22 kepptu Lárus Ingi og Einar Ingi.

Menntaskólinn á Tröllaskaga hefur lagt aukna áherslu á rafíþróttir og tölvuleiki að undanförnu. Á síðustu önn var t.d. kenndur áfangi í rafíþróttum þar sem sjónum var m.a. beint að hreyfingu og mataræði.

Á þessari önn eru nemendur MTR við nám í rafíþróttum, tölvuleikjafræði, leikjahönnun og myndlist í tölvuleikjum. Það eru mikil sóknarfæri í tölvuleikjaheiminum og því mikilvægt að mennta fólk til starfa í þessari grein.

Frá þessu var greint á MTR. (Forsíðumynd frá mtr.is, HHÓ)