Nemendur MTR hjóluðu Lágheiðina til Siglufjarðar

Nemendur í íþróttahópi þemavikunnar í MTR unnu þrekvirki í vikunni með því að hjóla frá Ólafsfirði í gegnum Lágheiðina til Siglufjarðar. Hjólað var frá Ólafsfirði yfir Lágheiði, um Ketilás til Siglufjarðar og þaðan í gegn um Héðinsfjarðargöngin til Ólafsfjarðar.

Þátttaka var góð og almenn ánægja með ferðina er heim var komið. Sextán nemendur MTR lögðu af stað um morguninn frá Ólafsfirði en flestir hjóluðu til Siglufjarðar sem eru 63 kílómetra, en tveir kláruðu hringinni til Ólafsfjarðar og hjóluðu samtals 80 kílómetra. Það voru þær Hugrún Pála Birnisdóttir 16 ára og Ólöf Þóra Tómasdóttir 15 ára sem hjóluðu lengst.

Snjór var efst á Lágheiði en að öðru leyti var vegurinn auður og veður var gott. Ferðin reyndi mjög á einbeitingu og úthald en flestum þótti hún skemmtileg, segir í fréttinni á heimasíðu MTR.is. Gísli Kristinsson fylgdi hópnum á pallbíl og tók myndirnar sem fylgja fréttinni.

Fleiri myndir má sjá hér.

Heimild: www.mtr.is

Myndir: Gísli Kristinsson