MTR tekur Græn skref í Ríkisrekstri

Menntaskólinn á Tröllaskaga skráði sig í lok október í verkefnið Græn skref í Ríkisrekstri.  Skólinn hefur hlotið viðurkenningu fyrir fyrsta Græna skrefið. Innleiðing skrefsins gekk fljótt og vel í skólanum og er endurnýtingu hluta gert hátt undir höfði.  Í listsköpun sinni nýta nemendur til að mynda alls konar hluti sem falla til á heimilum og í skólanum og búa til hluti og list úr slíkum efnivið.

Hólmfríður Þorsteinsdóttir, sérfræðingur hjá Umhverfisstofnun kom í skólann og skoðaði sérstaklega flokkunarmál og innkaup með tilliti til þess hvort keyptar væru vistvænar hreingerningavörur og pappír.  Skilyrði er að nota umhverfisvottaðar vörur.  Markmið verkefnisins Græn skref í ríkisrekstri eru að efla vistvænan rekstur á kerfisbundinn hátt.  Tilgangurinn er að hafa jákvæð áhrif á umhverfið, bæta ímynd og starfsumhverfi  stofnana og draga úr kostnaði.

Tengiliður verkefnisins í MTR er Unnur Hafstað en við framkvæmdina reynir mest á Björgu Traustadóttur, Gísla Kristinsson og Jónínu Kristjándóttur, sem sjá um rekstur, innkaup og þrif hússins.

Þess má geta að Vínbúðin á Siglufirði hóf þátttöku í verkefninu í lok árs 2014 og hefur lokið fimm grænum skrefum.