Menntaskólinn á Tröllaskaga og Pálshús í samstarf

Viljayfirlýsing um samstarf Pálshúss í Ólafsfirði og Menntaskólans á Tröllaskaga var undirrituð í MTR í dag. Samstarfið mun meðal annars felast í heimsóknum nemenda skólans og nýtingu á safnkosti og sýningarsölum safnsins til skapandi starfa og verkefna nemenda. Einnig getur falist í samstarfinu miðlun á þekkingu starfsfólks Pálshúss til nemenda MTR með erindum um safnkostinn, uppbyggingu safnsins, frumkvöðlastarf, þátttöku í ferðaþjónustu á Tröllaskaga og fleiru. Þá er mögulegt að sýna verk nemenda í húsinu.

Í Pálshúsi er safn, menningar- og fræðslusetur. Í húsinu er Náttúrugripasafn Ólafsfjarðar og grunnsýningin „Flugþrá“ þar sem skoða má alla íslensku fuglaflóruna. Önnur grunnsýning er um Ólafsfjarðarvatn. Húsið er kennt við Pál Bergsson sem var forkólfur í útgerð í Ólafsfirði. Elsti hluti hússins var reistur í lok nítjándu aldar.

Það var Þorsteinn Ásgeirsson sem situr í stjórn Pálshúss og Þórarinn Hannesson, menningarfulltrúi MTR sem voru viðstaddir undirskriftina í dag.