List án landamæra á Akureyri og Siglufirði

List án landamæra er lifandi hátíð þar sem fatlaðir og ófatlaðir mætast og vinna saman í list sinni. Hátíðin á Norðurlandi er vettvangur viðburða og stendur frá 3.–22. maí.

Opnunarhátíðin var laugardaginn 3. maí í Síðuskóla á Akureyri  þar  sem bæjarstjórinn á Akureyri Eiríkur Björn Björgvinsson setti hátíðina og leikhópurinn Hugsanablaðran sýndu leikþáttinn.  Nemendur í tónlistarhópi Fjölmenntar voru með tónlistaratriði.

Vorfánar og alls konar myndir munu dagana 9.–23. maí prýða verslunina Eymundsson á Akureyri.

Garðurinn blómstar í Skógarlundi fimmtudaginn 15. maí og föstudaginn 16. maí  kl. 9-11 og 13–15.30. Þá er gestum og gangandi boðið að koma í heimsókn. Í garðinum verða sýnd verk notenda sem eru unnin undir handleiðslu myndlistarkonunnar Aðalheiðar S. Eysteinsdóttur og starfsmannafélag Skógarlunds mun selja veitingar.

Af öðrum dagskrárliðum Listar án landamæra á Norðurlandi má nefna opið hús í Iðjunni á Siglufirði fimmtudaginn 8. maí og föstudaginn 9. maí kl. 9-17.  Þar gegna tónlist og ljóðalestur mikilvægu hlutverki ásamt handverkssýningu notenda Iðjunnar. Á Húsavík verður opið hús, vormarkaður og kaffihúsastemning í Miðjunni laugardaginn 17. maí  kl. 14–16. Í Samkomuhúsinu á Húsavík verða þrjár sýningar sunnudaginn 18. maí á Stuttmyndinni X kl. 13, 15 og 17. Þetta er hetjustuttmynd byggð á Þrymskviðu og hinum japönsku sentai ofurhetjum en myndin er unnin í samstarfi við Sam og Marinu Rees.

Markmið Listar án landamæra er að auka aðgengi, fjölbreytni og jafnrétti í menningarlífinu. Að koma list fólks með fötlun á framfæri og koma á samstarfi á milli fatlaðs og ófatlaðs listafólks. Sýnileiki ólíkra einstaklinga er mikilvægur, bæði í samfélaginu og í samfélagsumræðunni og hefur bein áhrif á jafnrétti á öllum sviðum. Það er von aðstandenda hátíðarinnar að sem flestir komi og njóti þess sem um er að vera.

Heimild: Akureyri.is