Leggja áfram til bann á lausagöngu katta á varptíma fugla í Fjallabyggð

Skipulags- og umhverfisnefnd Fjallabyggðar tók fyrir að nýju mál vegna lausagöngu katta sem nefndin samþykkti á síðasta fundi sínum að banna á tímabilinu frá 1. maí til 15. júlí ár hvert. Bæjarstjórn Fjallabyggðar vísaði málinu aftur til nefndarinnar á fundi sínum þann 17. mars síðastliðinn.
Skipulags- og umhverfisnefnd Fjallabyggðar hefur lagt til að 11. gr samþykktar um kattahald verði breytt þannig að hún verði svohljóðandi:

Eigendum katta ber skylda til þess að taka tillit til fuglalífs á varptíma, frá 1. maí til 15. júlí, og er lausaganga katta bönnuð á þeim tíma.

Þessi breyting var samþykkt með þremur atkvæðum en Hjördís Hjörleifsdóttir sat hjá og Ingibjörg Guðlaug Jónsdóttir greiddi atkvæði á móti tillögunni.

Ingibjörg Guðlaug Jónsdóttir lagði fram eftirfarandi bókun:
11. gr samþykktar um kattahald verður skerpt með dagsetningu á bjöllunotkun og takmörkun á lausagöngu katta. Þessu yrði svo fylgt eftir með auglýsingu og bréfum til kattareigenda.
14. greinin yrði útvíkkuð þannig að heimilt væri að handsama bjöllulausa ketti að undangengnu samþykki heilbrigðisnefndar.

Þá sendi Kristján Ragnar Ásgeirsson inn erindi til Fjallabyggðar dagsett þann 5. mars þar sem fyrirhuguðu banni við lausagöngu katta er mótmælt.

Bæjarstjórn Fjallabyggðar mun taka endanlega ákvörðun í málinu.

Cat, Flower, Kitten, Stone, Pet, Animals, Explore