Framkvæmdastjórn Heilbrigðisstofnunar Norðurlands hefur komist að þeirri niðurstöðu að leggja af sjúkrabílavakt í Ólafsfirði en að sjúkrabíllinn verður áfram staðsettur þar og verður tiltækur ef aðstæður krefjast. Stefnt er að því að mynda hóp vettvangsliða í samstarfi við slökkvilið og/eða björgunarsveit til að sinna fyrsta viðbragði áður en sjúkrabíll kæmi frá Siglufirði eða í undantekningartilfellum frá Dalvík.
Bæjarráð Fjallabyggðar hefur mótmælt harðlega ákvörðun Framkvæmdarstjórnar Heilbrigðisstofnunar Norðurlands og hefur hvatt þá til að endurskoða ákvörðun sína.
Í Fjallabyggð eru tveir sjúkrabílar en í Ólafsfirði eru sex aðilar sem skipta með sér vöktum fyrir sjúkrabílinn í Ólafsfirði. Tveir af þeim eru fastir starfsmenn HSN og sinna sjúkraflutningum á dagtíma samhliða öðrum störfum og taka einnig vaktir. Aðrir sjúkraflutningamenn taka vaktir og starfa einnig hjá öðrum fyrirtækjum.
