Landsmót hestamanna haldið á Hólum sumarið 2016

Landsmót hestamanna verður haldið á Hólum í Hjaltadal sumarið 2016. Stjórn Landsmóts hestamanna ákvað þetta á fundi þann 6. mars síðastliðinn.

Þann 19. desember 2014 skrifuðu Landsamband hestamannafélaga, Gullhylur ehf., Sveitarfélagið Skagafjörður og Hólaskóli undir viljayfirlýsingu um að halda Landsmót hestamanna á Hólum í Hjaltadal sumarið 2016.

Í fréttatilkynningu frá Lárusi Ástmari Hannessyni, formanni Landsambands hestamanna segir:

,,Það er virkilega ánægjulegt að þetta mál sé í höfn. Ég er sannfærður um að Landsmót á Hólum í Hjaltadal, þar sem æðstu menntastofnun íslenska hestsins í heiminum er vistuð, mun verða glæsilegt mót og nýtast hestamönnum í nútíð og framtíð vel. Ég er viss um að Skagfirðingar munu taka vel á móti okkur eins og þeim er lagið.“