Karatefélagið Fram á Skagaströnd bauð til æfingabúða með Karin Hägglund í íþróttahúsinu á Skagaströnd dagana 21.-23. september síðastliðinn.
Karin kemur frá Svíþjóð og er margfaldur Norðurlandameistari í kata og hefur nú síðast unnið með sænska katalandsliðinu. Hún hefur áður komið til Íslands til að þjálfa íslenska landsliðið. Hún kom til Skagastrandar og var með æfingabúðir fyrir börn og konur.
Bryndís Valbjarnardóttir er þjálfari hjá Karatefélaginu Fram á Skagaströnd og bauð hún iðkendum Júdódeildar Tindastóls á æfingabúðirnar til að prófa karate sem er, líkt og júdó, japönsk bardagaíþrótt. Um var að ræða einstakt tækifæri til að prófa karate undir handleiðslu frábærra þjálfara.
Samtals voru fimm æfingar haldnar frá föstudegi fram á sunnudag. Morgunæfingar voru fyrir alla, börn og konur, en eftirmiðdagsæfingar voru einungis fyrir konur.
Æfingabúðirnar heppnuðust afar vel og voru gestir heillaðir af fegurð bæjarins og því góða og óeigingjarna karatestarfi sem Bryndís hefur sinnt á Skagaströnd. Þess má geta að Bryndís hefur verið gestaþjálfari Júdódeildar Tindastóls í Blönduðum Bardagalistum.
Texti: Tindastoll.is /