Íslandsbanki færði Síldarminjasafninu málverk

Mikil gleði ríkti í Bátahúsinu Síldarminjasafnsins í vikunni þegar forsvarsmenn Íslandsbanka færðu safninu málverkið „Konur í síldarvinnu“ eftir Gunnlaug Blöndal að gjöf.

Anita Elefsen, safnstjóri, veitti verkinu móttöku fyrir hönd safnsins og flutti þakkarávarp. Þar kom fram að lengi hafi „síldarstúlkurnar í bankanum“ verið eins og eitt af kennileitum bæjarins. Litríkar síldarstúlkurnar hafi á dimmum og snjóþungum vetrum verið eins og táknmynd um vonina eftir nýrri sumarkomu. Þegar síldin færi að veiðast á ný og bærinn fylltist af ótrúlegu lífi og fjöri og óþrjótandi verðmætasköpun. Segja má að verkið sé orðið mjög víðförult, en það hefur verið sent á sýningar erlendis og til Reykjavíkur – og stundum mikill efi um hvort það skyldi nokkurn tíma rata aftur heim til Siglufjarðar.

Málverkinu er ætlað stórt hlutverk í nýrri sýningu safnsins í Salthúsinu, sem vonandi auðnast að opna innan fárra ára. Þar verður fjallað um veturinn í síldarbænum og verður málverkið „Konur í síldarvinnu“ eins og sólríkur miðdepill í dimmum og snjóþungum vetrinum.

img_2208
Mynd og heimild: sild.is