Héðinsfjörður - Fréttavefur í Fjallabyggð
Paradís í Fjallabyggð ------> [magnus@hedinsfjordur.is]
Mögulega er ófullnægjandi vatnsgæði á Siglufirði og íbúar hvattir til að sjóða neysluvatn samkvæmt tilkynningu sem Fjallabyggð sendi út í dag.
Heilbrigðiseftirlit Norðurlands vestra tók sýni þann 12. júlí 2024 í einu íbúðarhúsi norðarlega á Siglufirði og kom munnleg tilkynning frá rannsóknarstofu í dag um að E. coli baktería hefði greinst í vatninu.
Í samræmi við samræmdar leiðbeiningar stjórnvalda eru neytendur upplýstir um málið, en Heilbrigðiseftirlitið hefur þegar tekið fleiri sýni m.a. á Heilbrigðisstofnun Norðurlands til þess að staðfesta og fá nánari hugmynd um umfang mengunarinnar.
Í samræmi við 14. gr. reglugerðar um neysluvatn nr. 536/2001, ráðleggur Heilbrigðiseftirlitið í varúðarskyni að neysluvatnið á Siglufirði, sé soðið fyrir neyslu.
Fjallabyggð vill koma því á framfæri að allt neysluvatn á Siglufirði er geislað. Geislatæki hefur verið yfirfarið og ekkert athugavert kom fram við þá skoðun sem gæti skýrt mengun sé hún til staðar í vatnsveitu.