Hollvinasamtök Heilbrigðsstofnunar Fjallabyggðar

Nú um nokkurn tíma hefur undirbúningshópur unnið að stofnun Hollvinasamtaka Heilbrigðsstofnunar Fjallabyggðar ( HVSF )  Í hópnum eru bæði íbúar Fjallabyggðar og brottfluttir.  Kveikjan að stofnun samtakanna er einlægur áhugi á að efla og styrkja þessa mikilvægu stofnun og leggja því lið að áfram verði starfrækt góð og öflug heilbrigðisþjónusta í Fjallabyggð.  Slík samtök eru starfrækt víða um land og hafa víðtækt hlutverk, ekki bara að veita heilbrigðistofnunum fjárhagsstuðning þegar á þarf að halda heldur einnnig að veita stjórnendum stofnananna stuðning og hvatningu í ýmsum framfara – og hagsmunamálum.

Undirbúningshópurinn leitað eftir ráðleggingum frá m.a. Hollvinasamtökum Sjúkrahússins á Seyðisfirði og  Hollvinasamtökum Heilbrigðisstofnunarinnar á Blönduósi.  Hollvinasamtök víðsvegar um landið hafa gjarnan starfað með öðrum félagasamtökum sem láta sig samfélagið varða.    Komið hefur verið á góðu samstarfi við Siglfirðingafélagið í Reykjavík og  undirbúningshópurinn vonast eftir góðu samstarfi við Kvenfélag Sjúkrahússins sem í gengum áranna rás hefur unnið mikið starf á þessum vettvangi.   Væntanlega verður leitað til fleiri félagasamtaka sem starfa í Fjallabyggð og eru forsvarsmenn hvattir til að setja sig í samband við undirbúningshópinn ef áhugi er fyrir hendi.

Það er von undirbúningshópsins að sem flestir íbúar Fjallabyggðar, sem og brottfluttir Ólafsfirðingar og Siglfirðingar gerist félagsmenn í samtökunum.   Árgjaldi verður mjög stillt í hóf og verður það grunnurinn að þeim sjóði sem nýttur verður til góðra verka.   Nú þegar hafa borist framlög frá félagasamtökum til undirbúnings stofnunar samtakanna.  Reikningur hefur verið stofnaður í Sparisjóði Siglufjarðar og lögð drög að samþykktum samtakanna.

Fyrirhugað er að stofnfundur samtakana verði haldinn í Reykjavík í lok maí og stuttu síðar verður haldinn framhaldsstofnfundur í Fjallabyggð.  Fundirnir verða auglýstir í fjölmiðlum og á vefsvæðum sem láta sig varða málefni Fjallabyggðar.

Heimili og varnarþing Hollvinasamtaka Heilbrigðisstofnunar Fjallabyggðar verður í Fjallabyggð og talsmaður undirbúningshópsins er Theodór Júlíusson leikari, sími 664-0409 theodor@borgarleikhus.is

Heimild: Hellan 20. Apríl 2012