Heilbrigðisstofnun Þingeyinga gert að spara 71,6 m.kr árið 2012

Bæjarráð Norðurþings ályktaði eftirfarandi á fundi sínum í gær varðandi tillögur Fjárlaganefndar Alþingis til fjárlaga 2012

Í fjárlagafrumvarpinu kemur fram að Heilbrigðisstofnun Þingeyinga er gert að draga saman í rekstri sem nemur um 71,6 m.kr.  eða um 8,5% á árinu 2012.  Verði þetta að veruleika er ljóst að grípa þarf til uppsagna starfsmanna og endurskipulagningar á  starfsemi stofnunarinnar.  Sá blákaldi veruleiki blasir við að haldi þessi stefna áfram verður sjúkrahússtarfsemi stofnunarinnar lögð af með íþyngjandi kostnaði fyrir íbúa í Þingeyjarsýslum.
Fjárlagafrumvarpið felur í sér aðför að þeirri þjónustu sem starfrækt er í dag við stofnunina, sem í dag er skilgreind sem lágmarksþjónusta.  Heilbrigðisstofnun Þingeyinga hefur undanfarin ár dregið úr og hagrætt í rekstri sínum sem nemur 24% með boðuðum viðbótarniðurskurði stefnir í að kostnaður verði lækkaður um tæp 33% á fjórum árum. Það sem vekur ugg,  gremju og reiði er að tillögur fjárlagafrumvarpsins fela í sér;

•       Óafturkræfar aðgerðir með tilheyrandi þjónustuskerðingu
•       Viðbótarkostnað fyrir íbúa Þingeyjarsýslna.
•       Frumvarpið er þvert á viljayfirlýsingu milli ríkisstjórnarinnar og sveitarfélaganna í Þingeyjarsýslum um uppbyggingu atvinnulífs í sýslunum, sem undirrituð var 25. maí 2011. En þar stendur orðrétt; Aðilar eru sammála um mikilvægi þess að staðinn verði vörður um opinbera þjónustu á svæðinu, sem nauðsynleg er þegar til uppbyggingar kemur.

Bæjarráð Norðurþings harmar þau skilaboð sem ríkisstjórn Íslands sendir þegnum sínum í Þingeyjarsýslum og fer fram á að forsvarsmenn ríkisstjórnarinnar  komi til fundar við fulltrúa sveitarfélaganna í Þingeyjarsýslum þannig að hægt verði að fara yfir þá alvarlegu stöðu sem upp er kominn.