Gáfu skíði til leikskólans í Ólafsfirði

Stjórn Skíðafélags Ólafsfjarðar kom færandi hendi á leikskólann Leikhóla í Ólafsfirði í dag og færði honum fjögur pör af gönguskíðum og skóm sem henta eldri árgöngum skólans. Með þessari gjöf vill Skíðafélag Ólafsfjarðar kynna gönguskíðaíþróttina fyrir börnunum og gefa öllum færi á að prófa gönguskíði.
Börnin tóku þessari gjöf fagnandi og skiptust á að fara á skíði í útiverunni. Nýja leikskólalóðin í Ólafsfirði hentar mjög vel til gönguskíðaiðkunnar þannig að það var líf og fjör hjá unga skíðafólkinu í dag. Þessi góða gjöf mun auka enn á fjölbreytni í vetrarstarfi og útivist leikskólabarnanna.

Frá þessu var greint á vef Fjallabyggðar.

Myndir: frá vef Fjallabyggðar