Framkvæmdir hafnar á Hólum fyrir Landsmótið

Framkvæmdir við mótssvæðið á Hólum í Hjaltadal eru hafnar og unnið er hörðum höndum að því að aðstæður verði sem glæsilegastar þegar Landsmót hestamanna verður haldið þar dagana 27. júní til 3. júlí 2016. Landsmót var síðast haldið á Hólum 1966, og verða því liðin 50 ár frá síðasta móti þar. Þær framkvæmdir sem nú standa yfir felast fyrst og fremst í því að útbúa og laga reiðvelli og áhorfendasvæði, en einnig ýmislegt annað tengt umgjörð mótsins. Aðalverktaki við framkvæmdirnar er Vélaþjónustan Messuholti ehf.

Heima á Hólum eru nú þegar til staðar ýmiss konar mannvirki, stofnanir og rekstur sem styðja við fyrirhugað Landsmótshald. Þar má nefna þrjár reiðhallir, fjöldi hesthúsa og töluvert gistirými, sem og Sögusetur íslenska hestsins. Þá er enn ónefndur Háskólinn á Hólum sem óumdeilanlega er í fararbroddi á heimsvísu, hvað varðar menntun og rannsóknir í tengslum við íslenska hestinn. Hólar skipa því mikilvægan sess í hugum unnenda íslenska hestsins um veröld víða.

holarframkvaemdir

Heimild og mynd: skagafjordur.is