Framboðskynningar í Fjallabyggð – 4. sæti X-H

Þorgeir Bjarnason skipar 4. sæti H-listans, Fyrir Heildina í Fjallabyggð. Þorgeir hefur reynslu af sveitarstjórnarmálum og hefur verið í ýmsum nefndum og ráðum í Fjallabyggð.

“Þorgeir Bjarnason heiti ég og skipa 4. sæti  H-listans í Fjallabyggð.  Ég hef verið í sambúð með Guðný Huld Árnadóttur leikskólakennara síðan 1999  og eigum við saman þrjú börn; Árna Hauk 17 ára, Laufey Petru 12 ára og Mundínu Ósk 7 ára.  Ég er fæddur í Siglufirði 30. mars 1971  og hef ég alla tíð búið hér.

Ég hef starfað sem málari síðan ég var 18 ára, kláraði sveinspróf í málaraiðn frá Iðnskólanum í Reykjavík 1996 og lauk Meistaraprófi 1998.  Ég vann hjá föður mínum Bjarna Þorgeirssyni málarameistara til 2009, þá stofnaði ég fyrirtækið Málaraverkstæðið ehf ásamt samstarfsmanni mínum Mark Duffield. Ég hef einnig starfað sem sjúkraflutningamaður síðan 2006 og hef ég lokið menntun sem neyðarflutningarmaður frá Sjúkraflutningaskólanum.

Ég hef verið í stjórnmálum frá því um tvítugt þá aðallega í sveitastjórnarmálum og hef ég starfað í nokkrum nefndum og ráðum, oftast í Umhverfis- og Skipulagsnefnd.  Íþrótta- og félagsmál hafa alla tíð verið mér hugleikin og hef ég setið í stjórnum allmargra félaga hér í sveitafélaginu. Það má af því leiða að íþrótta-, tómstunda- og menningarmál verði sett á forgangslista hjá mér næsta kjörtímabil ásamt ýmsum öðru málum sem ég hef áhuga á til þess að gera sveitafélagið enn meira aðlaðandi fyrir okkur sem búum hér og einnig að fá fleiri einstaklinga til þess að setjast hér að.”

Kveðja, Þorgeir Bjarnason