Frá Aðgerðastjórn almannavarna á Norðurlandi vestra

Aðgerðastjórn almannavarna á Norðurlandi vestra hefur verið starfandi frá því 9. mars síðastliðinn. Í aðgerðastjórn sitja fulltrúar lögreglustjóra, heilbrigðisstofnunar Norðurlands, almannavarnanefnda, Rauðakrossins og björgunarsveita Slysavarnafélagsins Landsbjargar.
Vettvangsstjórnir eru starfandi á Hvammstanga, Blönduósi og á Sauðárkróki sem sjá um verkefni í umboði aðgerðastjórnar á sínu svæði.

Í vettvangsstjórn á Hvammstanga situr sóttumdæmislæknir Vesturlands á Hvammstanga en Vestur Húnavatnssýsla fellur undir sóttvarnaumdæmi Vesturlands á meðan austur Húnavatnssýsla og Skagafjörður falla undir sóttvarnaumdæmi Norðurlands. Verkefnið hefur almennt gengið vel og er aðgerðastjórn í góðum samskiptum við sóttvarnalækni og samhæfingarstöð almannavarnadeildar ríkislögreglustjóra.

Alls eru 29 einstaklingar á Norðurlandi vestra í einangrun með COVID 19, flestir í Húnaþingi vestra alls 26 og þrír einstaklingar í Skagafirði. Tveir einstaklingar hafa náð bata en 468 einstaklingar hafa verið í sóttkví á svæðinu frá upphafi en í dag er tala þeirra sem eru í sóttkví 91.

Aðgerðastjórn hefur undanfarna daga verið í sambandi við fyrirtæki og stofnanir á svæðinu í þeim tilgangi að brýna fyrir aðilum um gerð áætlana um órofinn rekstur starfseininga. Í því felst að fyrirtæki og stofnanir geri áætlun um hvernig bregðast eigi við ef upp kemur smit þannig að hægt verði að halda úti lágmarks starfsemi og þjónustu við íbúa svæðisins. Þetta verkefni er vel á veg komið og hefur aðgerðastjórn safnað áætlununum saman. Aðgerðastjórn vill beina tilmælum til þeirra fyrirtækja og stofnana sem ekki hafa komið sér upp slíkri áætlun að gera það hið fyrsta og senda á aðgerðarstjórn í netfangið astnvland@gmail.com.

Mynd frá Lögreglan á Norðurlandi vestra.