Flug hefst á ný á Sauðárkrók

Skrifað var undir samninga í dag milli Isavia og Air Arctic (Eyjaflugs) um áætlunarflug milli Sauðárkróks og Reykjavíkur. Rúmt ár er síðan Ernir hætti flugi á þessari leið og síðan þá hafa heimamenn unnið að því að koma áætlunarflugi á aftur, með aðstoð innanríkisráðuneytisins og Sveitarfélagsins Skagafjarðar.

Flogið verður fimm daga vikunnar allt árið, alls sjö flug á viku. Samið var um flugið til eins árs. Drög að samningi milli Air Arctic og sveitarfélagsins liggja fyrir og hafa verið kynnt í byggðaráði.  Vonast er til að sá samningur verði samþykktur einróma.

Stefnt er að fyrsta áætlunarfluginu þriðjudaginn 29. janúar. Fram að því verður Alexandersflugvöllur undirbúinn hvað tækjabúnað varðar.

Flogið verður með 9 sæta flugvél. Á þriðjudögum og fimmtudögum verður flogið tvisvar á dag á milli Sauðárkróks og Reykjavíkur en einu sinni á mánudögum, föstudögum og sunnudögum. Ekki verður flogið á miðvikudögum og laugardögum.

Þetta eru mjög góðar fréttir fyrir íbúa á Sauðárkróki, Fjallabyggð og næsta nágreni. Flugið gerir Norðurland vestra samkeppnishæfara við aðra landshluta.