Fimm atriði frá Norðurlandi á Samfés

NorðurOrg 2019 fór fram í íþróttahúsinu í Ólafsfirði föstudagskvöldið 25. janúar síðastliðinn. Um stóran viðburð var að ræða þar sem um 480 unglingar komu saman frá félagsmiðstöðvum víðsvegar af Norðurlandi.  Með unglingunum voru um 40 starfsmenn félagsmiðstöðva.  Níu atriði kepptu um fimm sæti í úrslitakeppninni, Söngkeppni Samfés sem fram fer í Laugardalshöll 23. mars næstkomandi. Fimm atriði komust áfram og taka þátt í úrslitum í Laugardalshöll en þau koma frá Fjallabyggð, Akureyri, Skagafirði, Dalvík og Hvammstanga.

Fyrir hönd Neons, félagsmiðstöðvarinnar í Fjallabyggð kepptu hljómsveitin Ronja og ræningjarnir. Þau fluttu lagið Back to black. Söngur var í höndum Ronju Helgadóttur en aðrir í hljómsveitinni eru þeir Júlíus Þorvaldsson, Tryggvi Þorvaldsson, Mikael Sigurðsson, Kristján Már Kristjánsson og Hörður Ingi Kristjánsson.

Óhætt er að segja að kvöldið hafi tekist vel. Allir unglingarnir voru til mikillar fyrirmyndar og félagsmiðstöðvum sínum og sjálfum sér til mikils sóma. Hæfileikarnir á sviðinu voru gríðarlega miklir og þar fóru upprennandi listamenn sem öruggt er að við eigum eftir að sjá meira af í framtíðinni.

Heimild: Fjallabyggð.is