Félagsmiðstöðin Neon í nýtt húsnæði á Siglufirði

Fjallabyggð hefur fjárfest í húsnæði fyrir félagsmiðstöðina Neon við Suðurgötu 4 á Siglufirði, en um er að ræða eign á 2. hæðinni í húsnæðinu.

Síðastliðið haust auglýsti Fjallabyggð eftir hentugu framtíðarhúsnæði til kaups eða leigu undir starfsemi félagsmiðstöðvarinnar NEON.

Síðustu ár hefur verið stefnt að því að félagsmiðstöðin fái eigið húsnæði fyrir starfsemi sína og hófst undirbúningur m.a. með því að skoðanakönnun var lögð fyrir unglinga sem sækja félagsmiðstöðina um hvar þeir vildu sjá starf félagsmiðstöðvarinnar staðsett til framtíðar og með hvaða hætti sú starfsemi ætti að vera.

Ráðast þarf í ákveðnar breytingar á húsnæðinu þannig að það megi rúma starf félagsmiðstöðvarinnar sem best. Einnig verður aðgengi hreyfihamlaðra tryggt með stigalyftu. Ætlunin er að vanda til verka við framkvæmdirnar og mun félagsmiðstöðin hefja starfsemi sína í hinu nýja húsnæði strax næsta haust.

Heimild: fjallabyggð.is

Mynd: fastinn.is