Elías Þorvaldsson útnefndur Bæjarlistamaður Fjallabyggðar við hátíðlega athöfn

Elías Þorvaldsson hefur verið útnefndur Bæjarlistamaður Fjallabyggðar árið 2020. Er það í ellefta sinn sem bæjarlistamaður er útnefndur í Fjallabyggð.
Athöfnin fram fór í Menningarhúsinu Tjarnarborg í vikunni en þar voru einnig formlega afhentir, menningar- og fræðslustyrkir, styrkir til reksturs safna og til hátíðarhalda.

Ólafur Stefánsson formaður markaðs- og menningarnefndar og Linda Lea Bogadóttir markaðs- og menningarfulltrúi Fjallabyggðar afhentu styrkina.

Við athöfnina voru flutt tónlistaratriði og fram komu þau Hörður Ingi Kristjánsson sem spilaði á píanó, Guðmann Sveinsson og Hólmfríður Ósk Norðfjörð Rafnsdóttir fluttu tvö lög og Karlakórinn í Fjallabyggð fyllti svo Tjarnarborg með söng sínum undir stjórn Elíasar Þorvaldssonar bæjarlistamanns. Að lokinni athöfn bauð Fjallabyggð gestum upp á léttar veitingar.

Í ár voru úthlutaðir styrkir til fræðslu- og menningarmála að upphæð 10.600.000.-  Þar af fara kr. 2.700.000.- til einstakra menningartengdra verkefna, kr. 3.250.000.- til hátíðarhalda og kr. 2.750.000.- til reksturs safna og setra. Styrkur til fræðslumála nam kr. 100.000.- og framkvæmdastyrkur til Pálshúss nemur kr. 1.500.000.-
Að auki er árlegur styrkur til bæjarlistamanns Fjallabyggðar kr. 300.000.-

Heimild: Fjallabyggð.is

Myndir: Fjallabyggð / Albert Gunnlaugsson
Myndir: Fjallabyggð / Albert Gunnlaugsson