Dalvíkingar fá upphitaðan gervigrasvöll

Sveitarstjórn Dalvíkurbyggðar hefur samþykkt samning um uppbyggingu íþróttasvæðis á Dalvík en samningurinn þess efnis var undirritaður mánudaginn 14. maí síðastliðinn. Dalvíkurbyggð greindi fyrst frá þessu.

Um nokkurra ára skeið hefur verið unnið að gerð deiliskipulags fyrir íþróttasvæðið á Dalvík. Tillaga þess efnis hefur verið samþykkt og staðfest í sveitarstjórn Dalvíkurbyggðar.  Í þeirri tillögu er gert ráð fyrir uppbyggingu á upphituðum gervigrasvelli á íþróttasvæðinu á Dalvík.

Dalvíkurbyggð og UMFS hafa skipað sameiginlega nefnd sem verður ráðgefandi og eftirlitsaðili með framkvæmdinni. Gert er ráð fyrir að framkvæmdir við völlinn hefjist í haust, en þá verður keppnisvöllurinn rifinn upp og hafist handa við jarðvinnu. Gert er svo ráð fyrir að gervigrasið verði lagt vorið 2019.