Matreiðslumeistararnir Sigurvin Gunnarsson og Sverrir Þór Halldórsson voru á Hannes Boy og Kaffi Rauðku á Siglufirði í sumar til að smakka rétti og skrifa veitingarýni fyrir vefinn Veitingageirinn.is. Þeir voru svo án fyrirvara beðnir um að dæma í keppninni um besta síldarréttinn 2014 sem haldin var yfir Síldardagana á Siglufirði í sumar.
Hátíðin var haldin dagana 24. júlí til 4. ágúst síðastliðið sumar og er til heiðurs síldarinnar. Á sunnudeginum 3. ágúst var haldin hin árlega keppni síldaráhugamanna um hver lagaði besta réttinn úr síld.
Borð var sett út á bryggjukantinn fyrir framan við Hannes Boy og réttunum komið fyrir þar og tók dómnefnd til starfa.
Heimir Hannesson yfirmatreiðslumeistari á Hannes Boy kvað upp úrslitin sem voru:
- 6. sætið – Alíslensk síldarsnitta
- 5. sætið – Heitur síldarbakstur
- 4. sætið – Síldarbollur með graslaukssósu
- 3. sætið – Rússnenskt síldarsalat með rúgbrauði
- 2. sætið – Síld í pylsubrauði
- 1. sætið – Bláberjasíld með skyrsósu og rúgbrauði
Dómnefndin sagði um sigurréttinn: “Framsetning glæsileg, afbragðs gott bragð, heildarsamspil á bragði var frábært”.
Myndir: Veitingageirinn.is